لحظات الصفا، في وصف العشق، الوجد، و ايضا الجفا

انا العاشق مغرم صبابة،حطيت محبتي على كفي و مسكت الربابة،نفسي يدخلوني مكانهم، و اه من لياليهم يا ابا

و انا في الظلام من غير شعاع يهتكه
اقف مكاني بخوف و لا اتركه
و لما يجيي النور و اشوف الدروب
احتار زيادة ايهم اسلكه

و عجبي

تجربة

أغمض عينيك..... ارهف سمعك.... انسى كل ما كدرك و تذكر فقط .... روحك، استمع لصوت المدونة قبل ان تتصفح، تحياتي

Friday, July 13, 2007

بلدى وحبيبتى

الغرام فى الدم سارح
والهوى طارح معزة
والحنين للقرب بارح
والنوى جارح يا عزة
يابتسامة فجر هلت
بددت ليلى الحزين
يا ندى الصبح اللى شقشق
فوق خدودى الدبلانين
بل شوقهم
صحى لون الورد فوقهم
مين يدوقهم
مين سواكى
يا حياتى يا ملاكى
يا نسيم الحب لما هب هز القلب هزة
يا هوى الأحلام يا عزة
ومين سواكى
الليلة دى يا حبيبتى
جم خدونى
جوز تنابلة ونص دسته من التيران
كنت بحلم يا حبيبتى
كنت بحلم بيكى انتى
ومين سواكى يا حياتى يا ملاكى
يا نسيم الحب لما هب هز القلب هزة
يا هوى الأحلام يا عزة
كنا قال انا وانتى قال
فى جنينة خضرا ومحاوطها البرتقان والسيسبان
وانتى جوا قرنفلاية فى العبير بتستحمى
اجرى يمك يا هوايا تسبقينى وتجرى يمى
احضنك واشرب عبيرك من شفايفك
والغصون واقفة شايفة بتراعينا
بس خايفة من العيون
والعيون بتقول كلام
والكلام طاير حمام
بيهادينا بالمحبة وينادينا بالسلام
وانطلق فى الجو فجأة
يا حبيبتى صوت مفاجأة
صوت يخلى الدم يجمد
اصحى ياحمد اصحى ياحمد
انتو مين؟
فين إمام ؟
احنا ناس مكلفين
تيجى سالك مش هاتتعب
واحنا طبعا معذورين
انتو دود الأرض والآفة المخيفة
انتو ذرة رمل فى عنين الخليفة
انتو علة فى جسم بلدى
انتو جيفة
سكتوه ابن الكلاب
سففوه من التراب
فتشوا كل الأماكن
طلعوا رفوف الدولاب
كممونى يا حبيبتى
كتفونى
قومونى
قعدونى
كل شعرة فى جسمى بالعين فتشوها
والمخدة من جنانهم شرحوها
وانتهى التفتيش
مافيش..صدقينى ماتخافيش
هو انا يا عزة عندى ممنوعات
غير بحب الناس واكره السكات
بص واحد من التنابلة جوا عينى
وانتى عارفة عنيا صافية وطيبين
شباكين عالقلب دوغرى منورين
كان مناه يلمح علامة خوف بسيطة
طب هاييجى الخوف منين ابن العبيطة
هو مين فينا الجبان
ولا مين فينا اللى خان
اللى قلبه بالأمانى وبالربيع الأخضر مزهر والأغانى
ولا كلب الصيد وأسياده الأباطره اكالين لحم البشر فوق الصوانى
هو بص فى عينى بصة وانحمق وفى حلقةه غصة
واتعوج ومال وقال كلمتين مش مفهومين
أصله شاف صورتين جمال
فى العيون الطيبين
مصر فى العين الشمال
وانتى فى العين اليمين
عن الفاجومى

3 comments:

mo'men mohamed said...

حاسس بالرتم السريع فى القصيدة الجميلة دى
جزاك الله كل خير
بس كان عندى سؤال
مين عزة دى ؟؟؟
السلام عليكم

DantY ElMasrY said...

عزيزى مؤمن اشكرك على تعليقك وتواصلك معاى
عزة دى كانت زوجة الفاجومى وهى المطربة النصف مشهورة عزة بلبع

Unknown said...

مدوناتك جميلة أوى يا حفصة باين عليكى فنانة ؟ :)
قصيدة غاية فى الروعة بجد مش مجاملة و كلامها مس قلبى برقة و حنان أحييكى من كل قلبى :) :)